དེ་བསྒང་ལས་སླབ་ནི་ཡོད་པའི་རྫོང་ཁའི་ཚིག་དར་ཁྱབ་གཏང་དགོཔ་འདུག།
༉ འབྲུག་རྒྱལ་ཁབ་ རང་དབང་རང་བཙན་གྱི་ངོ་རྟགས་དང་། ལམ་ལུགས་སྲོལ་གྱི་གཞི་རྟེན་གཙོ་བོ་ཅིག་ རྒྱལ་ཡོངས་སྐད་ཡིག་འདི་ཨིན་ནི་འདི་གིས་ དེ་ལུ་བརྩི་མཐོང་བསྐྱེད་དེ་ དར་ཁྱབ་གཏང་དགོ་པའི་འགན་ཁག་འདི་ འབྲུག་པའི་མི་སེར་ཆ་མཉམ་ལུ་ཕོགཔ་ཨིན་པས། སྐད་ཡིག་མཁས་མཆོག་ཚུ་གིས་འབད་བ་ཅིན་ སྐད་ཡིག་འདི་ སྐྱེ་ནི་དང་ ཤི་ནི་ཡོདཔ་མ་ཚད། དོ་མཉམ་གྱི་མིང་ཚིག་ལེ་ཤ་ཡོད་པ་ཅིན་ ཁ་སྐད་ཕྱུགཔོ་སྦེ་ཆ་བཞག་དོ་ཡོད་རུང་ ན་འཐན་སྦེ་དབྱེ་བ་དཔྱད་དེ་ལྟཝ་ད་ ཚིག་གསརཔ་བཟོ་མི་དང་ མགུ་མཇུག་སློག་སློགཔ། ཕྱིའི་ཁ་སྐད་དང་སྦྱེལ་ཏེ་ འབྲི་སྲོལ་དང་སླབ་སྲོལ་ལུ་ཤུགས་ཐལ་མི་འདི་གིས་ དང་ཕུ་དུས་རྒྱས་ལས་ར་སླབ་ནི་ཡོད་པའི་མིང་ཚིག་མང་ཤོས་ཅིག་ འགྲོས་ཀྱིས་གཏང་སྟེ་ ར་ཡལ་ནིའི་ཉེན་ཁ་སྦོམ་འདུག། འ་ནེ་སྦེ་ཨིན་ནི་འདི་གིས་ ད་ལྟོ་དུས་ཚོད་མ་ཕྱིསཔ་ཅིག་ལས་ སློབ་གྲྭ་ཁག་ལུ་ ངག་གཤིས་ཀྱི་མིང་ཚིག་ཚུ་ དར་ཁྱབ་གཏང་ནིའི་ལམ་ལུགས་ཅིག་འགོ་བཙུགས་ཚུགས་པ་ཅིན་ དེ་བསྒང་གི་མིང་ཚིག་ཚུ་ཡང་ ད་ལྟོ་དར་ཁྱབ་ཡོད་པའི་མིང་ཚིག་ཚུ་དང་འདྲན་འདྲ་སྦེ་དར་ཁྱབ་གཏང་མ་ཚུགསཔ་མི་འོང་ཟེར་མནོཝ་མས།