ཁོང་ཡིད་ལྷག། ལཱ་ཚུ་གི་སྐོར་ལས་ མནོ་བསམ་ལོག་ཅི་ལོག་ཅི་གཏང་བ། དཔེར་ན།སེམས་འཚབ་འཚུབ་འབད་དེ་ ཁོང་ཡིད་ལྷག་སྟེ་ར་སྡོད་པ་ཅིན་ རང་གི་གཟུགས་ཁམས་འཕྲོད་བསྟེན་ལུ་གནོདཔ་ཨིན།
ངོ་བཅག། རང་གི་མི་དང་ཆ་རོགས་ཨིན་ཟེར་ཆ་བཞག་བརྩི་སྟེ་ ངོ་སྲུང་མ་འབད་བ། དཔེར་ན། གཞུང་གི་ཕྱག་ཕྱིད་ཞུཝ་ད་ རང་གི་སྤུན་ཆ་དང་གཉེན་ཉེཝ་ཚུ་གི་ངོ་བཅག་སྟེ་ དྲང་པོའི་ཐོག་ལས་ཕྱག་ཞུ་དགོ།
ཆང་ཀ་ཆུང་ཀུ། མི་དང་སེམས་ཅན་ ཅ་ལ་ག་ཅི་ར་ཨིན་རུང་ སྦོམ་དང་འགངས་ཅན་མེན་པར་ཆུང་ཀུའི་རིགས། དཔེར་ན། མི་ཆང་ཀ་ཆུང་ཀུ་ཨིན་པས་ཟེར་ བང་ཅན་དབང་བཙོང་འབད་ནི་མི་འོང་།
ཚ་ཕག་ཕ། མི་ཆང་འཐུང་མི་ཚུ་ ཆང་གནམ་མེད་ས་མེད་ཤུགས་སྦེ་ཡང་མ་འགྲངསམ་སྦེ་ ཀྲིག་ཀྲི་ཅིག་བཟི་སྟེ་ཡོད་པ། དཔེར་ན། ཆང་ཚ་ཕག་ཕ་ཅིག་སྦེ་བཞག་པ་ཅིན་ ག་ཅི་ཡང་འབད་ཚུགས།
ཆུ་ཐག་ཆོད། ས་དང་ ཚོདམ་ཚུ་ཆུ་སྐམ་སྟེ་ སྐམ་ཀྲོག་ཀྲོ་འགྱོ་བ་དང་ མི་འབད་བ་ཅིན་ ཉམས་མྱོང་ཚུད་མི། དཔེར་ན། ས་ཚ་སའི་གཡུས་ཚུ་འབདན་ ན་འཐན་ར་ ཆུ་ཐག་ཆོད་སོ་ནུག་མས།
པམ་ལེ་ལེ། ན་ཟུག་མེདཔ་ཡང་མེན་ ཤུགས་སྦེ་ཡང་མ་རྐྱབ་པར་ ག་ཅི་ཨིན་ན་གུ་ཅི་ཨིན་ན་མ་ཤེས་པར་ཡོད་པ། དཔེར་ན། སེན་མོ་རྡོའི་བར་ན་བསྒྲལ་ད་པ་ཅིན་ པམ་ལེ་ལེ་སྦེ་སྡོདཔ་ཨིན།
བུད་ཀྲ། ཁུར་ཆའི་རིགས། དཔེར་ན། བླ་མའི་བུད་ཀྲ་འབག་མི་འདི་ ངར་ངེ་ཅིག་འདུག།
བློ་ཕུགས་སིལ་སུ། ཤུལ་མ་གི་དོན་ལུ་ གཏན་གཏན་མེདཔ་འཚམས་ཅིག། དཔེར་ན། ཁོ་གི་ཚོང་གི་ལཱ་འདི་ལུ་བལྟ་བ་ཅིན་ བློ་ཕུགས་སིལ་སུ་ཅིག་མས།
འཚོ་ཀག་ཀ། མི་དོད་རིལ་རི་དང་ རྒྱགས་རིལ་རི་ཡོད་པ། དཔེར་ན། ཁོ་གི་བུ་འདི་འབདན་ འཚོ་ཀག་ཀ་ཅིག་འདུག་མས། མེབ་ཕྱི་འཚོ་ཀག་ཀ་གིས་ གནམ་མེད་ས་མེད་ཐང་ཆུ་ཐོནམ་ཨིན།
རིགཔ་ཆི་ནུག།མཐའམ་ཅིག་སླབཔ་ཙམ་གྱིས་ ག་ར་ཁ་གསལ་སྦེ་ཧ་གོ་བ། དཔེར་ན། ང་གིས་ཚུལ་ཙམ་སླབཔ་ཅིག་གིས་ ག་ཅི་སླབཔ་ཨིན་ན་ ག་ར་ཁོ་གིས་རིགཔ་ཆི་ནུག།
རེ་ཙ་གཉིས་ཙ། གྱངས་ཁ་ལེ་ཤ་མེད་པར་ ཉུང་དྲགས་སྦེ་ཡོད་པ། དཔེར་ན། ཁོ་གི་ཚོང་ཁང་འདི་ནང་ ཅ་ལ་གོང་སྦོམ་ནི་འདི་གིས་ ཚོང་ཉོ་མི་ མི་རེ་ཙ་གཉིས་ཙ་མ་གཏོགས་མི་འོང་པས།
བསྲན་མ་ཚུགས། ག་ཅི་གུ་ཅི་ཅིག་ སེམས་ཁར་མནོ་སྟེ་ འབད་ར་མ་ཚུགས་པ། དཔེར་ན། ང་གིས་མོ་ལུ་ བསྲན་མ་ཚུགས་པར་ ལོ་དང་ཟླ་བ་ཡར་སོ་ཡི།
ཧ་ལས་ད་ལྟོ་ཚུན་ཚོད། ལཱ་ཅིག་འགོ་བཙུགས་ཞིནམ་ལས་ ད་རེས་ཀྱི་བར་ན། ཁྱོད་ ཧ་ལས་ད་ལྟོ་ཚུན་ཚོད་ སྐད་ར་མེད་པར་ ག་ཏེ་འཛུལ་སོངམ་སྨོ།
ཧ་རི་ཧུ་རི། མི་འཚབ་འཚུབ། དཔེར་ན། ཁོ་མི་ཧ་རི་ཧུ་རི་ཅིག་ཨིན་པས།