རྫོང་ཁའི་ནང་ཡོངས་འབྲེལ་འཆར་སྒོ་བཟོ་དགོཔ་འདུག་ག།
Dzongkha Labthang
རྒྱལ་ཁབ་ཀྱི་གོང་འཕེལ་དང་བསྟུན་ཏེ་ ད་རེས་ནངས་པ་ ཨིང་སྐད་ནང་ཡོངས་འབྲེལ་འཆར་སྒོ་ཐང་མེདཔ་ཅིག་བཟོ་སྟེ་ཡོད་ནི་འདི་གིས་ མི་དམངས་ཀྱིས་ བརྡ་དོན་དང་ཞབས་ཏོག་འཐོབ་ནི་ལུ་ དཀའ་འཚེགས་ག་ནེ་ཡང་མེད་པར་ སྡོདཔ་སྡོད་ས་ར་ འཛམ་གླིང་བསྐོར་རིས་རྐྱབ་ཚུགས་པས།
ནེ་ཅོག་འཐདཔ་སྦེ་ རྫོང་ཁའི་ནང་ཡང་ ཡོངས་འབྲེལ་འཆར་སྒོ་འཇམ་སམ་རེ་བཟོ་སྟེ་ཡོད་པ་ཅིན་ ཨིང་སྐད་མ་པ་ལས་ར་མ་མཁྱེན་མི་ཚུ་ལུ་ ཕན་ཐོགས་འབྱུང་འོང་ཟེར་མནོཝ་མས། གཞུང་གི་ཡིག་ཚང་དང་སྒེར་སྡེ་ལ་ལུ་ཅིག་གིས་ རྫོང་ཁ་དང་ཨིང་སྐད་ཀྱི་ཡོངས་འབྲེལ་འཆར་སྒོ་ ལོགས་སུ་སྦེ་བཟོ་སྟེ་ཡོད་ས་ཅིག་རུང་ ཁ་ཕྱེ་སྟེ་ལྟཝ་ད་ ཁྱལ་གྱིས་ཕོག་ཕོགཔ་བཟུམ་སྦེ་ ཁ་ཡིག་ཅིག་ལས་བརྒལ་ཏེ་ ཨིང་སྐད་ནང་བཟུམ་སྦེ་བྲིས་བྲིསཝ་ དེ་དང་འདི་ཨིན་ཟེརཝ་ཅིག་མིན་འདུག། ཨིན་རུང་ནེ་སྦེ་བྲིས་ཏེ་ཡོད་མི་འདི་ དྲག་པའི་གྲངས་སུ་སྦེ་བརྩི་དགོ་པས། ག་ཅི་སྨོ་ཟེར་བ་ཅིན་ ལ་ལུ་ཅིག་གིས་ རྫོང་ཁའི་ཡོངས་འབྲེལ་འཆར་སྒོ་ མ་ད་སྤུ་ལས་ར་མིན་ནུག།
གཞོན་སྐྱེས་བསོད་ནམས་ཅན་ཚུ་གིས་ཡང་ རྒྱལ་ཡོངས་སྐད་ཡིག་ལུ་ དང་འདོད་བསྐྱེད་དགོ་པ་ཅིན་ རྫོང་ཁའི་ཡོངས་འབྲེལ་འཆར་སྒོ་ག་དེ་མང་མ་དགོཔ་འདུག། སྒྲིག་རང་ལས་མེདནི་རོགས་ལས་མེད་ཟེར་དོཝ་བཟུམ་སྦེ་ ཕམ་གིས་ར་ཡོངས་འབྲེལ་འཆར་སྒོ་རྫོང་ཁའི་ནང་བཟོ་བཟོཝ་མེད་པ་ཅིན་ བུ་གཞིས་ཀྱིས་ དང་འདོད་བསྐྱེད་ནི་འདི་དགོད་བྲ་འཚམས་ཅིག་འོང་།
རྟ་སྲབ་ཐག་ཐུངནི་བཞོན་དགོ་བདེ། །བློ་ཚིག་ཐང་ཐུངནི་ཉན་དགོ་བདེ། ། ཟེར་སླབ་དོཝ་བཟུམ་སྦེ་ ལོ་རྒྱུས་མང་མ་པ་ ནཱ་ལུ་རྫོང་ཁའི་ནང་ཡོངས་འབྲེལ་འཆར་སྒོ་ཅིག་དགོ་པའི་ཐུགས་འདོད་ཡོད་པ་ཅིན་ བཀའ་གནངམ་རྒྱ་ལ་དང་། །ཕྱག་ཞུཝ་གཏན་རྐྱང་། །ཟེར་སླབ་དོཝ་བཟུམ་སྦེ་ རྫོང་ཁ་སླབ་ཐངས་གྲོས་སྟོན་ཞབས་ཏོག་གིས་ སྟོང་མ་སྦེ་ཐོབ་པའི་ཡོངས་འབྲེལ་འཆར་སྒོ་འཇམ་སམ་བཟོ་ནི་ལུ་ཕྱག་ཞུ་འོང་ལགས།
ཚོ་ཉོ་རྒྱུ་མེད་རུང་བལྟ་རྒྱུ་ཡོད་ཟེར་སླབ་དོ་བཟུམ་སྦེ་ ཚར་གཅིག་འབྲེལ་བ་མཛད་གནང་ལགས། ༼༄༅༽