༉ རྫོང་ཁ་སླབ་ཐངས་གྲོས་སྟོན་ཞབས་ཏོག་གི་ ཡོངས་འབྲེལ་འཆར་སྒོ་འདི་ནང་ལུ་ ཁག་ཆེ་ཏོག་ཏོ་དང་ གོ་ཆོདཔ་ཅིག་ག་ནེ་ཡང་མེད་རུང་། ཐུགས་ཁོམ་བཏོན་ཏེ་གཟིགས་མི་ལུ་ སེམས་ཀྱི་ཧིང་ལས་དགའ་ཚོར་ཡོད།
བར་སྐབས་ཅིག་ལས་ འཛམ་གླིང་ནང་ བརྡ་དོན་འཕྲུལ་རིག་གོང་འཕེལ་དང་བསྟུན་ཏེ་ ཤེས་ཡོན་བརྗེ་སོར་གྱི་ལམ་ངོ་མ་ཅིག་ ཡོངས་འབྲེལ་ཨིནམ་འདི་ ང་བཅས་ར་ག་ར་གིས་མ་མཁྱེནམ་མེད།
འབྲུག་རྒྱལ་ཁབ་ནང་ཡང་ ཨིང་སྐད་ཀྱི་སྐུ་ཡོན་ཡོད་མི་ཚུ་གིས་ ཡོངས་འབྲེལ་འཆར་སྒོ་ གཅིག་ལས་གཅིག་དྲགཔ་སྦེ་བཟོ་སྟེ་ཡོད་མི་འདི་མཐོངམ་ད་ གནམ་མེད་ས་མེད་ངལ་རངས་པས། དེ་འབདཝ་ད་ རྒྱལ་ཡོངས་སྐད་ཡིག་རྫོང་ཁའི་ཡོངས་འབྲེལ་འཆར་སྒོ་བཟོ་མི་ཉུང་སུ་ཅིག་ལས་བརྒལ་ཏེ་མེད་པའི་ཁར། འདིའི་ནང་ལས་ཡང་གཞུང་གི་ལྷན་ཁག་དང་། ལས་ཁུངས་ཁག་གི་ཡོངས་འབྲེལ་འཆར་སྒོ་ཚུ་ ཆུ་མ་སྐམ་ཅིག་དང་། །ཉ་མ་ཤིཝ་ཅིག ། ཟེར་སླབ་དོ་བཟུམ་ཅིག་ལས་བརྒལ་ཏེ་མ་མཐོང་།
རེམ་གཉིསམ་གིས་ རྫོང་ཁའི་ནང་ཡོངས་འབྲེལ་འཆར་སྒོ་ཆོག་སྒྲིག་བཀལ་ཏེ་བཟོ་རུང་ མཐོང་བསྐྱེད་མི་དེ་དང་འདི་ཨིན་ཟེརཝ་ཅིག་མེདཔ་མ་ཚད་ དུམ་གྲ་རེ་གཟིགས་མི་ཚུ་གིས་ཡང་ ཐུགས་འཆར་ག་ནེ་ཡང་བཀོད་ནི་མེད་ནི་འདི་གིས་ སེམས་ཕམ་མས།
མི་གིས་ག་ཅི་སླབ་འོང་།
དང་པ་ར་ རོགས་ལུ་སྟོན་ནིའི་མནོ་བསམ་མ་གཏང་པར་ རང་གིས་ག་དེ་ཅིག་ལྷབ་ཚུགས་ཚུགསཔ་ལྷབ་དགོ་ལོ།
ལྷག་ནི་ཨིན་ན་དང་ བཞག་ནི་ཨིན་ན་འདི་ རང་གི་མ་མཁལ་འོག་གི་ ཐེབ་སོ་གངམ་འདི་དང་ར་འཁྲིལ་དགོ་ལོ་སུས།
རང་ལུ་གཞི་རྟེན་ཤེས་ཡོན་དང་། ཡང་ཅིན་ཤེས་ཡོན་ཁ་སྐོང་འཐོབ་པ་ཅིན་ བྱིན་ནི་བཅའ་ནི་མེད་རུང་ དགའ་ཚོར་བསྐྱེད་དགོ་ལོ།